Servicio
Guia social

Departamento di Asunto Social ta ofrece un parti di e servicio den e siguiente barionan:

 

Nos tin 3 OPC (oficina pa comunidad) situa na:

  1. Oranjestad (inclui Sta. Cruz, Dakota & Ponton)

  2. Tanki Lender (inclui Paradera & Noord)

  3. San Nicolaas (inlcui pariba di brug)

 

Den cada OPC tin un team di  e seccion guia social. E team ta consisti di 4 diferente trahado:

  1. Trahado social

  2. Trahado di hubentud

  3. Trahado di bienestar

  4. Trahado administrativo (procedura di ayudo individual​)

Cada un di e trahadornan aki ta ofrece un servicio specifico.

 

E tarea di e trahado social

E trahado social ta ofrece sosten, conseho y guia na clientenan cu pa un of otro motibo ta den un situacion dificil. Esei por ta un problema na unda e persona no sa con pa sali di dje of e persona por tin un pregunta y ta desea un conseho.

 

Algun ehempel pakico por acerca e trahado social:

  1. Pregunta of problema tocante vivienda

  2. Conseho of ayudo tocante bo situacion financiero

  3. Conseho of ayudo den un situacion dificil

  4. Problema entre pareha

  5. Problema den famia of entre bisiñanan

 

E trahado social por ofrece e siguiente servicio:

  1. Duna informacion y conseho

  2. Yuda e cliente compronde su situacion

  3. Formula metanan y un plan hunto cu e cliente

  4. Guia e cliente pa anda miho cu su situacion

  5. Intermedia pa e cliente cu un otro instancia

  6. Referi cliente pa e instancia corecto dependiendo e problematica

 

E trahado social por scohe pa duna ayudo den grupo. E ora ey diferente cliente cu e mes un problema ta wordo atendi conhuntamente. Esey ta sosode solamente si e clientenan ta acuerdo.

 

Banda di e servicio pa cliente e trahado social tambe ta participa den actividadnan educativo, p.e. e por duna charla, tayer of curso.

 

E tarea di e trahado di hubentud

E trahado di hubentud ta ofrece sosten, conseho y/of guia na mayornan, na mucha y hoben entre un edad di 0 te cu 24 aña. Como mayor bo por acerca e trahado di hubentud pa tur sorto di pregunta of problema rond di bo yiu.

 

E trahado di hubentud ta ofrece e siguiente servicio:

  1. Duna informacion y conseho

  2. Yuda e cliente compronde su situacion

  3. Formula metanan y un plan hunto cu e cliente

  4. Guia e cliente pa anda miho cu su situacion

  5. Guia y ayudo na cas

  6. Intermedia pa e cliente cu un otro instancia referi cliente pa e instancia corecto dependiendo e problematica.

 

E trahado di hubentud ta representa Departamento di Asunto Social den diferente proyecto y comicion.

E trahado di bienestar social

E trahado di bienestar ta asisti cliente den momento di crisis (material)  door di intermedia cu diferente instancia pa logra stabilisa e situacion problematico. Trahado pa bienestar ta sostene cliente cu cosnan practico dependiendo e plan di guia. Conhuntamente cu otro disciplina trahado di bienestar por organisa proyecto riba tereno di educacion fnanciero. Pa logra esey e trahado di bienestar ta traha conhuntamente cu organisacionnan profesional y gruponan boluntario.

E trahador di bienestar ta organisa actividadnan manera:

  • Charla, tayer y curso den bario

Procedura di ayudo individual

Ora un cliente ta acerca un oficina pa comunidad  nos ta sigui e siguiente procedura:

  • E trahado administrativo ta atende e cliente (personal of telefonicamente) y si e situacion no ta un crisis, cliente lo haya un cita cu trahado social of trahado pa hubentud.

 

  • E trahado social / trahado di hubentud ta haci un prome combersacion cu e cliente. E combersacion aki ta yama 'intake'. E ta importante pa e cliente bin cu informacion y documentonan cu tin di haber cu su situacion.

  • Durante e 'intake' e trahado social/ trahado di hubentud ta trata pa haya un bista amplio riba e pregunta of e problema di e cliente y e ta trata pa haya bista riba e causa di e problema.

  • Despues di e 'intake' e team ta dicidi cua profesional den e team ta miho pa sigui atende e cliente. Esey por ta e trahado social of e trahado di hubentud, eventualmente tur dos den cooperacion cu otro.

  • En cooperacion cu e cliente, e trahado ta traha un plan con e ayudo/guia ta bay tuma luga. Den e plan aki, e cliente tin un rol activo, e cliente mes ta keda responsabel pa e mehoracion di su situacion.

  • E ayudo/guia por tuma luga na e oficina pa comunidad of na cas di e cliente. En general nos ta uza e oranan di oficina pa atende cliente. Den situacionnan specifico ta posibel pa haci excepcion.

Kico nos ta spera di nos cliente?

Nos no ta duna e solucion na cliente, pasobra nos ta kere cu e cliente mes tin cu traha pa e solucion. Nos ta sostene e cliente riba e caminda pa yega na e solucion. Pesey nos ta spera di nos cliente cu e ta:

  • Duna nos tur informacion necesario.

  • Traha activamente na e solucion.

  • Ayudo boluntario.

  • Ayudo temporario.

  • Trahador ta sostene e cliente.

  • Responsabilidad ta di cliente mes.

Con pa tuma contacto cu nos?

E oranan pa yega sin afspraak na nos oficina ta:

Dialuna te diabierna entre 7:30 am te cu 12:00 pm y 1:00 pm te cu 4:30 pm.

Durante e oranan aki bo por pasa of yama libremente na e oficina den bo bario y bo lo wordo atendi.

Merdia entre 12:00 te cu 1:00 nos ta cera.

Si bo persona ta biba na Oranjestad of Sta. Cruz, yama: 528 - 1100

Team Oranjestad/St. Cruz/Dakota/Ponton

Caya Mario Harms 11 (antes Lagoenweg)

Fax: 588-6657

Si bo persona ta biba na Noord of Paradera, yama: 528 - 1100

Team Tanki  Lender/Paradera/Noord

Tanki Lender 275 A

Fax: 587-4545

Si bo persona ta biba na San Nicolaas of Savaneta yama: 528 - 1130

Team San Nicolaas/Pariba di Brug

Bernardstraat 75

Fax: 584-1639

© 2018 Departamento di Asunto Social - Directie Sociale Zaken

| Oranjestad - Caya Mario E. Harms 11 |San Nicolas- Bernardstraat 75, Aruba |

dsz@setarnet.aw

Tel 528-1100    Fax 583-5171

Bijstand - Guia Social - Bida & Famia - Abogado liber